International Sanctuary

Pontificium Consilium de Nova Evangelizatione Promovenda
Decretum

Supremum martyrum testimonium in Ecclesia omni aetate resonat. Stolas suas in sanguine Agni lavantes, per saecula Christi mortui ac in mortem victoris gloriosum testimonium martyres protulerunt, qui cum eo caritate et veritate unius fidei salutaris coniuncti perpetuo evadunt.
His tribus postremis saeculis etiam Ecclesia quae Coreanorum fines incolit diras admodum cognovit persecutiones, quae ad martyrium plura decem milia Christifidelium iuvenum, senum, episcoporum, sacerdotum, laicorum, consecratorum perduxerunt, qui omnes suo in corpore Christi morientis cruciantus tulerunt, ut, per suicuiusque sacrificium, ipsam, Domini vitam ostenderent.
Testimonium eorum, cum ipsorum in vultibus ipsius Christi vultus clare se aperuisset, valebit fidem posteris tradere et, etiam per intercessionem Sanctorum Andreae Kim Taegon et Sociorum necnon Beatorum Pauli Yun Ji-chung et Sociorum, valeat fieri communitas viva Jesu Christi discipulorum et testium, hoc confirmans priscorum Christifidelium certitudinem "sanguis martyrum, semen Christianorum."
Hanc igitur benigne excipiens postulationem Venerabilis Fratris Nostri Excellentissimi Lazari You Heungsik, Episcopi Taeieonensis, necnon Episcoporum Coetus Coreae ob magnam existimationem testimonii Sanctorum ac Beatorum Martyrum Coreanorum et propter ingentem utilitatem atque spiritualium populi beneficiorum copiam, quae locorum martyrii visitationem peregrinationes agentibus comparantur, hoc Pontificum Consilium de Nova Evangelizatione Promovenda, iuxta cann. 1231 et 1232 C.J.C. et art. 5 M.P. Sanctuarium in Ecclesia,

ERIGIT
Dioecesanum Sanctuarium Martyrum Coreanorum civitatis v.d. Haemi in
Sanctuarium Internationale
eiusque Statuta APPROBAT, iuxta instructionem in adnexo.
Ex Aedibus Pontificii Consilii de Nova Evangelizatione Promovenda, die XXIX mensis Novembris anno Domini MMXX,
Dominica I Adventus, Jubilaeo a Sancti Andreae Kim Taegon ortu CC annorum ineunte.

+ Salvator Fisichella, Arciep. Tit. Viconabentinus Praeses
Subsecretarius R.D. Graham Bell
Prot. N. ST/872020/P